مطبوعاتي اعلامیه

آیا په الفاشر باندې واکمني د پلان پای دی که لا هم په غېږ کې زهري غشي شته؟!

سوډان د خپلې جګړې په اوږدو کې چې له دوو کلونو څخه زیاته موده کیږي، یو لوی بدلون ولید، ځکه چې چټکو ملاتړو ځواکونو د الفاشر ښار په نیولو بریالي شول، کوم چې د هیواد په لویدیځ دارفور سیمه کې د سوډان د پوځ وروستۍ اډه وه، چې له دې سره یې په سیمه باندې خپل کنټرول ټینګ کړ، او اوس مهال نښتې په ګاونډي کوردوفان سیمه کې متمرکزې دي.

د ملګرو ملتونو د اټکلونو له مخې، له تېرې یکشنبې راهیسې له الفاشر څخه څه باندې ۳۶ زره ملکي وګړي بې ځایه شوي دي، چې ډېری یې ښځې او ماشومان دي، ځکه چې دوی له ډېرو سرغړونو سره مخ شوي، چې په هغو کې د هویت پر بنسټ وژل، سوځول، او د نجونو او ښځو جنسي تېري، برسېره پر لوټلو، غلا او د پیسو په بدل کې تښتول شامل دي. ډېری یې د طویله ښارګوټي ته تللي دي، چې ۷۰ کیلومتره لرې دی او په اصل کې یې شاوخوا ۶۵۰ زره بې ځایه شوي خلک ځای پر ځای کړي وو، چې دا په دغه ښارګوټي کې بشري وضعیت لا پسې خرابوي، کوم چې د دارفور په شمال کې د اوسېدونکو لپاره وروستۍ خوندي ځای ګرځېدلی دی. ملګرو ملتونو له هغه وروسته په الفاشر کې د بشري ناورین په اړه خبرداری ورکړ چې برهان له هغه ځایه د پوځ د وتلو اعتراف وکړ. دوی روښانه کړه چې چټکو ملاتړو ځواکونو هلته نوي وحشتناک جرمونه ترسره کړي دي، ځکه چې ویډیوګانو ښودلې چې د دوی اړوندو عناصرو د ملکي وګړو او د پوځ او د هغه سره متحدو ډلو د بندیانو په وړاندې ډله ییزې تصفیې ترسره کوي. د سوډان د ډاکټرانو شبکې، چې په بشري برخه کې کار کوي، چټک ملاتړي ځواکونه په الفاشر کې په یوازیني فعال روغتون کې د ناروغانو او د هغوی د ملګرو په تصفیه کولو تورن کړل. د سوډان حکومت، چې د هیواد په لرې ختیځ کې د پورټ سوډان ښار یې د خرطوم پر ځای د لنډې مودې پلازمېنې په توګه غوره کړی، وویل چې د چټکو ملاتړو ځواکونو سرغړونې د نسل وژنې جرمونو ته رسیږي، ځکه چې دوی د الفاشر ښار له نیولو راهیسې شاوخوا دوه زره ملکي وګړي وژلي دي، او هغه څوک چې له ښار څخه د وتلو هڅه کوي، هم له سرغړونو سره مخامخ شوي دي، چې په هغو کې جنسي تېري، غلا او د تاوان په بدل کې تښتول شامل دي. د یونیسف اجرایوي رییسې وویل چې په الفاشر کې شاوخوا ۱۳۰ زره ماشومان چې له ۵۰۰ ورځو څخه زیاته موده راهیسې محاصره دي، له سختو سرغړونو سره مخ دي، چې په هغو کې وژل، معیوب کول، تښتول او جنسي تاوتریخوالی شامل دي، او په یوه بیان کې یې ټینګار وکړ چې هلته هیڅ ماشوم خوندي نه دی، په داسې حال کې چې د خوړو، اوبو او درملو کمښت دی، او دوی له خرابو بشري حالاتو سره مخ دي.

د معمول په څېر، د امنیت شورا د هغو وحشتونو په اړه خپله اندېښنه څرګنده کړه چې چټک ملاتړي ځواکونه یې د ملکي وګړو په وړاندې ترسره کوي، او د جګړې له ټولو اړخونو یې وغوښتل چې سمدستي اوربند ته ژمن شي. دا هغه شورا ده چې د جګړې په ټوله موده کې حتی د غندنې او نیوکې لپاره هم غایبه وه، ځکه چې په هغې کې لوی یا اغېزمن هیوادونه هغه دي چې په سوډان کې جګړه پاروي.

ای د سوډان خلکو: تر څو به په سوډان او نورو هیوادونو کې شخړه د نړیوالو هیلو او د دوی د خبیثو پلانونو، لاسوهنو او د جګړې ښکیلو خواو ته د وسلو رسولو په پار د هغوی د شخړو لپاره سون توکي پاتې کیږي، ترڅو په بشپړه توګه پرې واکمن شي؟! ستاسو ښځې او ماشومان له دوو کلونو څخه زیاته موده کیږي چې له دې خونړۍ شخړې څخه کړیږي، چې یوازې په سوډان باندې د واکمنۍ په برخه کې د لویدیځ او د هغه د ملاتړو ګټې ترلاسه کوي، هغه هیواد چې د خپل موقعیت او شتمنیو له امله تل د هغوی لپاره د لالچ وړ و، نو د هغوی په ګټه ده چې هغه ټوټه ټوټه او خپور کړي. په الفاشر باندې د چټکو ملاتړو ځواکونو تسلط د دې پلانونو یوه بله کړۍ ده، ځکه چې امریکا په دې سره غواړي دارفور سیمه جلا کړي او په سوډان کې خپل نفوذ متمرکز کړي او په هغه کې د برتانوي نفوذ له منځه یوسي.

حل په ډیموکراتیک حکومت کې نه دی او نه هم په پوځي حکومت کې، بلکې په ټولو ډولونو او شکلونو او تابعینو سره د کافر استعمارګر لویدیځ له نفوذ څخه په خلاصون کې دی، حل د نبوت په منهج دویم خلافت راشده کې واک ته د اسلام په رسولو کې دی، ﴿إِنْ يَنْصُرْكُمُ اللَّهُ فَلَا غَالِبَ لَكُمْ وَإِنْ يَخْذُلْكُمْ فَمَنْ ذَا الَّذِي يَنْصُرُكُمْ مِنْ بَعْدِهِ وَعَلَى اللَّهِ فَلْيَتَوَكَّلِ الْمُؤْمِنُون﴾.

د ښځو برخه

د حزب التحریر د مرکزي مطبوعاتي دفتر څخه