نَفائِسُ الثَّمَراتِ
د هغه چا په هکله چې د خپل ورور په حاجت پسې ځي
له ابن عمر او ابوهریره رضی الله عنهم څخه روایت دی چې رسول الله صلی الله علیه وسلم وفرمایل: (څوک چې د خپل ورور په حاجت پسې ولاړ شي تر دې چې هغه حاجت یې پوره کړي، الله به د هغه لپاره پنځه اویا زره ملائکې مقررې کړي چې په هغه به درود وايي او د هغه لپاره به دعا کوي، که سهار وي تر ماښامه او که ماښام وي تر سهاره، او هغه به یو قدم هم نه پورته کوي مګر دا چې الله به د هغه په سبب یو ګناه معاف کړي او یوه درجه به لوړه کړي). ابوالشیخ او نورو روایت کړی دی.
او له انس رضی الله عنه څخه روایت دی چې رسول الله صلی الله علیه وسلم وفرمایل: (څوک چې د خپل مسلمان ورور په حاجت پسې ولاړ شي، الله به د هغه لپاره په هر قدم اویا نیکۍ ولیکي، او له هغه څخه به اویا ګناهونه معاف کړي، تر دې چې له هغه ځایه بیرته را وګرځي له کوم ځایه چې روان شوی و، نو که چیرې د هغه حاجت د هغه په لاس پوره شي، نو هغه به له خپلو ګناهونو څخه داسې وځي لکه هغه ورځ چې مور زیږولی وي، او که چیرې په دې منځ کې مړ شي، نو جنت ته به بې حسابه داخل شي). ابن ابی الدنیا په اصطناع المعروف کې او اصبهاني روایت کړی دی.
او له حسن بن علي رضی الله عنهما څخه روایت دی چې نبي صلی الله علیه وسلم وفرمایل: (بېشکه د مغفرت له موجباتو څخه یو دا دی چې ته خپل مسلمان ورور خوشحاله کړې). طبراني په الکبیر او الاوسط کې روایت کړی دی.
اللهم صل على سيدنا محمد وعلى آله وصحبه أجمعين
والسلام عليكم ورحمة الله وبركاته
