مطبوعاتي اعلامیه
ايا دا سېلابونه دي، که کشمير، که اقتصاد، او که هند زمونږ د سیندونو قبضه کول
تر څو به مونږ د نام نهاد بین المللي نظام د انتظار کوو چې زمونږ ستونزې حل کړي؟!
د خیبر پښتونخوا د شمالي سیمو په ځانګړې توګه د بونیر او شاوخوا سیمو کې د ویجاړونکو سېلابونو وروسته چې سلګونو کسانو خپل ژوند له لاسه ورکړ او کورونه، څاروي، شتمنۍ او موټرونه یې له ځانه سره یووړل، اوس د سېلابونو نوې څپې د پنجاب له لارې د سند صوبې په لور روانې دي. له دې وړاندې سختو بارانونو کراچۍ هم وځپله. له الله سبحانه وتعالی نه د سلامتۍ او عافیت غوښتنه کوو، ځکه چې د لا زیاتو بارانونو اټکلونه لا هم شته، په داسې حال کې چې زموږ واکمنانو له خپلو لاسونو پورته کولو او دا ټوله موضوع نړیوال نظام ته سپارلو پرته بل هیڅ حرکت نه دی کړی! دوی ټوله قضیه داسې وړاندې کوي لکه دا چې دا یوازې د اقلیم بدلون دی چې د دوی له ارادې څخه په بشپړه توګه بهر دی، او که نړیوال نظام مداخله ونه کړي، دوی به بې وسه پاتې شي، لکه د خلکو د ژوند او شتمنیو ساتنه د دوی مسؤلیت نه، بلکې د نړیوال نظام مسؤلیت دی!
د دغو واکمنانو لپاره د میلیونونو خلکو کړاوونه د نړۍ له ګوټ ګوټ څخه د "مرستو" په نوم د صدقاتو او مرستو راټولولو لپاره یوه نوې موقع ده؛ هغه پیسې چې د دوی په خزانو کې ځای پر ځای کیږي. په تېره لسیزه کې پاکستان هر کال له 1.4 څخه تر 2 ملیارد ډالرو پورې د "اقلیمي تمویل" په توګه ترلاسه کړي دي. په ځانګړې توګه د 2020 کال د سیلابونو وروسته، پاکستان په 2021 کال کې 4 ملیارد ډالر ترلاسه کړل. او لا دمخه یې د نړیوال نظام څخه د اقلیمي تمویل لپاره اته چنده زیاتې غوښتنې وړاندې کړي دي، چې له دې جملې څخه یو ملیارد ډالر د پیسو د نړیوال صندوق د "استقامت او پایښت اسانتیاو" تر عنوان لاندې ځانګړي شوي، د اقلیم سره د توافق او د ناورین خطرونو اداره کولو لپاره. د 2023 کال د جنورۍ په 9 مه، په جینیوا کې د اقلیم په وړاندې د مقاومت لرونکي پاکستان لپاره نړیوال کنفرانس جوړ شو، چیرې چې د پاکستان د 8 ملیارد ډالرو غوښتنې څخه ډېرې ژمنې وشوې، خو تر نن ورځې پورې یوازې له 20٪ څخه کمه برخه ترلاسه شوې ده. په دې توګه، واکمنانو د دې پر ځای چې د بحران په حل کې مسؤلیت په غاړه واخلي، بار یې نړیوال نظام ته واړاوه او یوازې د پیسو یوه برخه یې خپلو شخصي خزانې ته انتقال کړه.
دا مسله یوازې په سېلابونو پورې محدوده نه ده، بلکې د دغو واکمنانو د تلپاتې لیدلوري څرګندونه کوي، چې په دې باور دي چې زموږ د ستونزو حل د نړیوال نظام په لاس کې دی او پرته له هغه څخه موږ د خپلو ستونزو د حل لپاره هیڅ ځواک او وړتیا نه لرو. زموږ واکمنان او پالیسي جوړونکي د لوېدیځ د پریکړو کولو میکانیزمونو ته په لیوالتیا سره ګوري او له هغوی سره په کلکه تمسک د پرمختګ، تمدن او مسلکي توب معیار ګڼي، بلکې ډېری یې په مستقیم ډول د هغوی په لاس روزل شوي دي. همدا "لیدلوری" لویو قدرتونو ته زموږ په چارو کې د لاسوهنې او د خپلو پالیسیو سره سم د خپلو اجنډاوو د تېرولو لپاره وسیله ورکوي. که د کشمیر قضیه ملګرو ملتونو ته پرېښودل شي، یا د نړیوال بانک ته د سند د اوبو د تړون د پلي کولو واک ورکړل شي، دا د دې لیدلوري پایلې دي. که دا د روان حساب کسر وي، یا د دولتي عوایدو کسر، یا د انرژۍ بحران، زموږ واکمنانو - د دې لیدلوري له مخې - د پیسو د نړیوال صندوق اجنډا او دیکتات عملي کړی دی. او د همدې لیدلوري له امله د ټولنې د مختلفو ډلو حقوق د اروپایی او امریکایی اجنډاوو سره سم جوړیږي، چې له امله یې د پاکستان د خلکو لخوا بار بار احتجاجونه کیږي. حتی د دولت په مهمو بنسټونو کې هم د "اداري اصلاحاتو" په نوم لاسوهنې د نړیوال بانک یا د آسیا پراختیایي بانک لخوا تحمیل کیږي. د پاکستان پوځي او دفاعي پالیسۍ، سرحدي شخړې، یا د افغانستان په اړه ستراتیژي، په مستقیم ډول د پنټاګون، د امریکا د مرکزي قوماندې او بهرنیو چارو وزارت لخوا اداره کیږي، په داسې حال کې چې زموږ واکمنان د تل لپاره دوی ته وفادار پاتې کیږي. د دې لیدلوري په پایله کې زموږ خپلواکي د نړیوال نظام تابع شوې ده. او دا د حیرانتیا خبره ده چې همدغو واکمنانو د دې غلامۍ لیدلوري له امله د ملي مسایلو په حل کې خپله ناکامي د "دا د الله تقدیر دی!" په ویلو سره پټوي! که دوی اخلاقي جرئت درلودای، دوی به په خپله ناکامۍ اعتراف کړی وای!
خو په اسلام کې خلیفه د خلکو د ټولو چارو پالنه په غاړه لري او هغه ته روا نه ده چې د مسلمانانو هېڅ یوه مسئله د کفر سلطان ته وسپاري. الله تعالی په خپل کتاب کې فرمایي: ﴿وَلَن يَجْعَلَ اللَّهُ لِلْكَافِرِينَ عَلَى الْمُؤْمِنِينَ سَبِيلاً﴾، دا آیت په ښکاره ډول له مسلمانانو غواړي چې کافرانو ته د دوی په چارو کې د هیڅ ډول واک ورکولو څخه ډډه وکړي او دا په کلکه توګه حراموي. خلیفه به دا غلامۍ لید رد کړي او د مسلمانانو د ټولو چارو مستقیم مسؤلیت به په غاړه واخلي. د اوسنیو بودیجې اسنادو له مخې پاکستان 8.2 ټریلیون روپۍ د سود په توګه ورکوي. خلیفه به په دې حرامو او غیر مشروع بانکونو کې د دې مالي ځای کارول ودروي او پرځای به یې د اوږدې مودې پروژو ته لارښوونه وکړي ترڅو د سیلابونو او نورو بحرانونو څخه د مسلمانانو ژوند او شتمنۍ وساتي. د دغو واکمنانو له لرې کولو او د انحصار د سرطان په څېر لید له منځه وړلو پرته چې دوی یې تمثیل کوي، د پاکستان مسلمانانو ته د خلاصون لاره نشته.
د حزب التحریر مطبوعاتي دفتر
په پاکستان ولایت کې