Jarida la Habari la Jumanne kutoka Radio ya Hizb ut-Tahrir Wilaya ya Syria
2025/07/08M
Mada Kuu:
- Kufuatia mlipuko wa ghala la risasi katika mji wa al-Fouaa, mlipuko wa gari kaskazini mwa Idlib, na taarifa zinazokinzana kuhusu sababu.
- Kukamatwa kwa mmoja wa maafisa wa utawala uliopita katika eneo la Homs, na kusimamishwa kazi kwa waziri wa zamani wa elimu kwa tuhuma za ufisadi.
- Moto unaendelea kuenea katika pwani ya Syria huku juhudi kubwa zikiendelea kuuzima, kwa msaada wa Kituruki na Kijordani.
- Zaidi ya mashahidi 78 katika vita vipya vya mauaji ya kimbari huko Gaza, na wanajeshi 5 wa uvamizi wameuawa katika operesheni mpya ya upinzani.
- Trump hafikirii kufanya shambulio jipya dhidi ya Iran, na anasisitiza kuwa nchi yake "italazimika" kutuma silaha zaidi kwenda Ukraine.
Maelezo:
Mkurugenzi wa Idara ya Usalama wa Ndani huko Idlib, alifichua leo Jumanne, maelezo ya mlipuko uliotokea kaskazini mwa mji wa al-Fouaa, jana usiku. Alieleza kuwa mlipuko huo, uliotokea ndani ya ghala la risasi, ulikuwa na mabomu na makombora yaliyosalia kutoka kwenye vita, akibainisha kuwa mlipuko huo ulisababisha majeraha madogo na matukio ya kuzimia, kutokana na ukubwa wa mlipuko huo, bila kuripotiwa majeraha makubwa.
Gari lililipuka leo Jumanne karibu na mji wa Kulli, kaskazini mwa Idlib, katika ajali ambayo sababu zake hazijajulikana kwa usahihi hadi sasa. Vyanzo vya habari vya ndani vilisema kuwa asili ya mlipuko huo inaashiria uwezekano wa gari hilo kushambuliwa kwa ndege, na kuongeza kuwa uwezekano mkubwa shambulio hilo lilifanywa na ndege isiyo na rubani. Kwa upande mwingine, taarifa tofauti ziliripotiwa kutoka kwa mashuhuda, ambapo baadhi yao walisema kuwa gari lilikuwa limebeba risasi na lililipuka lenyewe, wakati wengine walieleza kuwa mlipuko huo ulitokana na shambulio la moja kwa moja. Mlipuko huo ulisababisha kifo cha mtu mmoja na kumjeruhi mwingine, katika hesabu ya awali.
Wizara ya Mambo ya Ndani ya Syria ilitangaza leo Jumanne kukamatwa kwa Brigedia Jenerali Riyad al-Shehadeh, ambaye alishikilia nyadhifa katika Usalama wa Kisiasa katika utawala uliopita. Wizara ilieleza kuwa Usalama wa Ndani katika eneo la Talkalakh katika eneo la Homs, ulimkamata al-Shehadeh, ambaye alikuwa mkuu wa tawi la Usalama wa Kisiasa huko Damascus. Wizara iliongeza kuwa al-Shehadeh anahusika na uhalifu wa kivita dhidi ya watu wa Syria, ikiwa ni pamoja na kuwaua mamia ya raia, pamoja na kukamatwa kiholela.
Naibu Mkuu wa Shirika Kuu la Usimamizi wa Fedha, Wassim al-Mansour, alifichua kuwa kusimamishwa kazi kwa Waziri wa zamani wa Elimu, Darem Tabaa, kulitokana na ripoti ya awali iliyoandaliwa na Shirika hilo, baada ya kazi ya uchunguzi iliyojumuisha kazi za Wizara ya Elimu wakati wa utawala ulioondolewa. Al-Mansour alieleza kuwa uchunguzi umeonyesha kuwepo kwa ukiukwaji unaohusiana na ufisadi wa kifedha na kupokea rushwa, pamoja na matumizi mabaya ya madaraka.
Vikosi vya Ulinzi wa Raia wa Syria, siku ya Jumatatu jioni, viliwahamisha wakaazi wa kijiji cha al-Ghassania katika eneo la Ras al-Bassit, kaskazini mwa Latakia, baada ya kuenea kwa moto usio wa kawaida na moto kuanza kukaribia maeneo ya makazi. Vikosi hivyo vilitangaza kuwa vinafanya kazi ya kuwahakikishia usalama wakaazi katika maeneo salama zaidi, huku shughuli za kuzima moto zikiendelea na kuzuia moto kuendelea kusonga mbele katika misitu minene iliyo karibu, huku juhudi zikiendelea kudhibiti moto na kuzuia kufikia hifadhi ya al-Frenlaq iliyo karibu. Ulinzi wa Raia ulithibitisha kusajiliwa kwa kuenea kwa moto mpya katika maeneo ya Karen Kol na al-Baraka katika eneo la Qastal Ma'af, ambayo iliongeza changamoto kwa timu za wazima moto wanaofanya kazi katika ardhi mbaya na maeneo yenye misitu minene. Timu za wazima moto kutoka Uturuki na Jordan zinashiriki pamoja na vikosi vya Syria, katika shughuli za kina za uwanjani zinazojumuisha safari za ndege na helikopta, kwa lengo la kupunguza joto na kufuatilia uenezaji wa moto, na juhudi kwa sasa zinaelekezwa katika kuzuia moto kufikia hifadhi ya al-Frenlaq, ambayo inachukuliwa kuwa moja ya misitu mikubwa na muhimu zaidi nchini Syria.
Mtandao wa Syria wa Haki za Binadamu ulirekodi mfululizo wa uvamizi wa ardhini uliofanywa na vikosi vya kundi la Kiyahudi ndani ya ardhi ya Syria ya kusini, ikijumuisha maeneo katika mikoa ya Quneitra, Damascus Vijijini na Daraa, katika kipindi cha kati ya Juni 9 na Julai 5, 2025. Idadi ya operesheni hizi zilizorekodiwa ilifikia operesheni 22 za uvamizi, zote zikiwa zimefanywa bila tangazo rasmi au onyo la awali, na ukiukwaji ambao ulifuatana na uvamizi huo ulijumuisha kuuliwa kwa raia mmoja, na kushikiliwa kwa angalau raia 13 kiholela, pamoja na kuvamiwa kwa shule na nyumba, na kubomolewa kwa zaidi ya nyumba 15 katika baadhi ya vijiji, na kuzuia harakati za raia kupitia vituo vya ukaguzi vya muda.
Rais wa Marekani Trump alielezea kupendezwa kwake na Rais wa Syria, Ahmed al-Sharaa, akisisitiza kuwa Wasiria wana nguvu na ufanisi mkubwa, na kwamba nchi yao inastahili nafasi ya kujenga upya na kufanikiwa. Trump alisisitiza hamu yake ya "Syria kujijenga upya", akisisitiza kuwa kuondolewa kwa vikwazo dhidi ya Syria kutaipa nafasi halisi ya kufanikiwa. Trump alisema katika taarifa za pamoja na Waziri Mkuu wa Kiyahudi, Benjamin Netanyahu, kwamba Netanyahu pia alimwomba aondoe vikwazo dhidi ya Syria.
Katika siku ya 641 ya vita vya mauaji ya kimbari huko Gaza, vyanzo vya habari katika hospitali za Gaza viliripoti kuuliwa kwa watu 78 katika mashambulizi ya kundi la Kiyahudi kwenye Ukanda huo tangu alfajiri ya leo Jumanne. Wakati huo huo, operesheni ya Beit Hanoun ya upinzani (kaskazini mwa Gaza) ilizua hisia kali miongoni mwa wasomi wa kisiasa katika kundi la Kiyahudi. Operesheni ya Beit Hanoun iliyofanywa na upinzani ilisababisha vifo vya watu 5 na majeruhi 16, baadhi yao wakiwa katika hali mbaya, katika safu za jeshi la uvamizi, na ripoti ya awali ya jeshi la uvamizi ilifichua kuwa shambulio la ghafla lililolenga kitengo cha Kiyahudi lilifanywa kwa kulipua mabomu 4 mfululizo na sio kwa wakati mmoja, na kwamba shughuli za msaada na uokoaji za kuwaondoa wanajeshi waliouawa na kujeruhiwa zilizidi kuwa ngumu kutokana na moto mkali uliokuwa ukifyatuliwa na upinzani. Kwa upande mwingine, kuna hali ya matumaini juu ya kufikiwa kwa makubaliano ya suluhu, kufuatia taarifa za maafisa wa Marekani. Nchini Lebanon, uvamizi huo ulidai leo kuwa ulimuua kamanda na mwanachama wa chama cha Iran cha Lebanon kwa mashambulizi mawili yaliyowalenga, Jumatatu, katika wilaya za Sur na Bint Jbeil, kusini mwa Lebanon.
Rais wa Marekani, Donald Trump, hakufikiria kufanya shambulio jipya dhidi ya Iran, akisisitiza kuwa mkutano wa karibuni utafanyika na Tehran. Trump alisema - akijibu maswali ya wanahabari wakati wa chakula cha jioni alichokifanya kwa ajili ya Waziri Mkuu wa Kiyahudi, Benjamin Netanyahu - kwamba anatumai kuwa vita na Iran vimeisha, akieleza kuwa uongozi wa Iran unataka kufanya mkutano wa kutafuta amani. Aliongeza kuwa hawezi kufikiria kwamba angependa kufanya shambulio lingine dhidi ya Iran kwa sababu anataka kupata suluhu, na akasisitiza kuwa mkutano utafanyika na Iran. Rais wa Marekani alieleza matumaini yake ya kuondolewa kwa vikwazo vikali vya Marekani dhidi ya Iran kwa wakati ufaao, kama alivyoeleza. Alifafanua kuwa hatua ya mwisho ya kuondoa vikwazo vya Marekani dhidi ya Syria itasaidia Damascus kusonga mbele, akieleza matumaini yake kwamba Iran itachukua hatua kama hiyo.
Rais wa Marekani, Donald Trump, alisema kuwa nchi yake "italazimika" kutuma silaha zaidi za kujihami kwenda Ukraine ili kujilinda dhidi ya Urusi, ambayo jana ilitangaza kuwa imedhibiti miji miwili katika mikoa ya Sumy na Dnipropetrovsk ya Ukraine. Wakati akimpokea Waziri Mkuu wa Kundi la Kiyahudi, Benjamin Netanyahu, jana, Trump alisema kuwa Waukraine "wanashambuliwa vikali sana na itabidi tutume silaha zaidi za kujihami kwanza kabisa". Trump alisema, akizungumza mwanzoni mwa sherehe ya chakula cha jioni aliyomwandalia Netanyahu katika Ikulu ya White House, "Sina furaha kabisa na Rais Putin".
Idadi ya waathiriwa wa mafuriko yaliyokumba jimbo la Texas la Marekani imeongezeka hadi watu wasiopungua 104, huku shughuli za utafutaji mkali zikiendelea kwa ajili ya makumi ya watu waliopotea, wengi wao wakiwa watoto waliokuwa wakiishi katika makambi ya majira ya joto wakati wa janga hilo. Mamlaka za mitaa zilisema kuwa Kaunti ya Kerr iliyopo katika eneo la "Texas Hill Country", ambapo Mto Guadalupe unapita, ilikuwa imeathirika zaidi, kwani ilirekodi vifo 84, ikiwa ni pamoja na watoto 28. Mashirika ya dharura yalithibitisha kuwa mvua kubwa ilisababisha kuongezeka kwa kiwango cha mto kwa karibu mita 8 katika dakika 45 pekee, ambayo ilisababisha kuongezeka kwa ghafla kwa mafuriko ambayo yaliharibu vibanda, kung'oa miti na kusomba magari.
